حه‌قیقه‌تێک له‌ خه‌وما بوو
نرخه‌که‌ی ماچه‌ بێ تامه‌که‌ی تۆ بوو
حه‌قیقه‌تێک
فریشته‌کان شایه‌تی بوون
خواوه‌نده‌کان لێی بێ ده‌نگ بوون ...
حه‌قیقه‌تێک بوو هه‌وره‌ خوێناویه‌کانی ئاسمان
فرمێسکی خوێنینی خۆیان بۆ زه‌وی نه‌ده‌رشت
ئه‌و سۆزداریه‌ی هه‌ور له‌گه‌ڵ زه‌وی هه‌یبوو
وه‌ک ره‌فتاری خودا !
بۆ ئیبلیسی نه‌فره‌ت لێ کراوی لێ هاتبوو
له‌ خه‌وما بوو
ئه‌و دیمه‌نه‌ درۆیینانه‌ی داڤنشی کێشابوونی
خه‌ریک بوو ده‌بوون به‌ راستی..
ئه‌هریمه‌نه‌کانیش که‌ قه‌تره‌یه‌ک به‌زه‌یی له‌ دڵیان دا نه‌بوو
خه‌ریک بوون ئاهوو رامزداکانی ده‌هریان بۆخۆیان گێژ ده‌دا
له‌خه‌وه‌که‌مدابینم
گیڤارای شه‌ره‌کان
خه‌ریکی چۆک دانان بوون بۆ دوژمن
ئاشقه‌ سه‌ر شێته‌کانیش
به‌ چاوی پڕ له‌ گومانه‌وه‌ ده‌یان رووانیه‌ مه‌عشوقه‌کانیان
له‌خه‌ومابوو
سه‌حراکان برسی گه‌رده‌لووله‌ تۆزاویه‌کان بوون
شه‌ونمی به‌ره‌ به‌یانیش
هێلانه‌که‌ی ببوه‌ رووه‌که‌دڕکاویه‌کانی سه‌حرا
ئه‌و حه‌قیقه‌ته‌ بو که‌ سۆکرات
له‌ هه‌وڵی سرینه‌وه‌ی بیر و باوه‌ره‌که‌ی بوو له‌ نێو خه‌ڵکی دا
له‌ دانایی که‌سیشی نه‌ده‌پرسی...
کۆماره‌که‌ی ئه‌فلاتوونیش
به‌ره‌و گه‌نده‌ڵی ده‌چوو
ئه‌ره‌ستۆی خوێندکاریش
رقی له‌ سیاسه‌ته‌که‌ی خۆی بوو
له‌خه‌وما بوو
له‌ خه‌ومابوو...

نووسینی ڕێگا شیاو ..

تایبه‌ته‌ به‌ کورد ژین