سەرباز عوسمان: 
له‌گه‌ڵ به‌ره‌وپێش چوونی دیموکراسیه‌ت له‌ جیهان به‌ گشتی و هه‌ڵپژانی پشکێکی به‌ر هه‌رێمی کوردستان ، وای له‌ کۆمه‌ڵگه‌ی کوردی کردووه‌ ،که‌ به‌خۆ داچوونه‌وه‌یه‌ک بکه‌ن له‌ گشت بواره‌ سیاسی و ئیدارییه‌کاندا. جێگه‌ی گومان نییه‌ ، که‌ بگوترێت ئه‌زموونی ڕابردووی چه‌ند ساڵه‌ی هه‌رێمه‌که‌مان تا ڕاده‌یه‌ک که‌م ته‌رخه‌می هه‌بووه‌ ، له‌ ئاست ئاریشه‌ ناوخۆیی و ده‌ره‌کییه‌کان ، که‌ ئه‌مه‌ش شتێکی وارده‌ و له‌ هه‌موو ده‌سه‌ڵاتێکی سیاسیدا به‌ قه‌باره‌ی خۆی بوونی هه‌یه‌ ، به‌ڵام هه‌میشه‌ جه‌ماوه‌ر و ده‌سه‌ڵات وه‌کو دوو پێگه‌ی به‌هێز و کارا خۆیان ده‌که‌نه‌ پردێک بۆ ده‌رباز بوون له‌و ئافاتانه‌ی ، که‌ ڕه‌نگه‌ دواتر ببێته‌ گێژاوێکی ماڵوێرانی بۆ ئه‌و نه‌ته‌وه‌یه‌ و کیانه‌ سیاسییه‌که‌ی.
بارودۆخی ئه‌مرۆی هه‌رێمی کوردستانیش پێویستی به‌و جه‌ماوه‌ره‌ هه‌یه‌ ، که‌ ده‌توانین بڵێین تا ئه‌مرۆش زیاتر له‌ سنوری غیابدا خۆی ده‌بینێته‌وه‌ ، نه‌ک به‌شدارییه‌کی هه‌مه‌کی ، که‌ پێویستیه‌کی حه‌تمییه‌ بۆ گشت پرۆسه‌ نه‌ته‌وه‌ییه‌کان . ئه‌م په‌راوێز خستنه‌ش ڕه‌نگه‌ له‌ به‌رژه‌وه‌ندی حیزبه‌ سیاسیه‌کان بووبێت ، یاخود بۆ له‌ ده‌ست نه‌دانی ئه‌و سه‌روه‌ریانه‌ی که‌ به‌ خوێنی شه‌هیدان وه‌ده‌ست هاتوون ، که‌ ئه‌مه‌ش ده‌لوێ ‌تا ڕاده‌یه‌ک ئیجابیاتی تێدا بووبێت . به‌ڵام له‌ کۆی ئه‌م هه‌ژده‌ ساڵه‌ی ئه‌دای حکومه‌تی هه‌رێم له‌ بواره‌کانی خزمه‌تگوزاری و یاسا و به‌ڕێوه‌بردن ، ‌ نه‌یان توانیوه‌ له‌ ئاستی پێویستدا خۆیان نیشان بده‌ن ، به‌مه‌ش جۆرێک له‌ بێئومێدی لای خه‌ڵک دروست بووه‌ ، که‌ له‌وانه‌یه‌ له‌مه‌و دوا ئه‌و زه‌مینه ڕه‌خساوه‌ و ویست و ئیراده‌ وایان لێبکات ، که‌ پرۆسه‌ی "گۆڕین" ‌ بکه‌نه‌ واقعێک و سارێژی هه‌موو ئه‌و ئیفلیجیانه‌ی ده‌سه‌ڵاتی کوردی پێبکه‌ن ، که‌ ساڵانێکه‌ خستوویه‌ته‌ سه‌رچۆک.
هه‌روه‌ها ده‌توانین بڵێین دواین هیوا ،که‌ بتوانێت جه‌ماوه‌ر له‌ دامێنی ده‌سه‌ڵاته‌وه‌ بکاته‌وه‌ سه‌ربار و له‌گه‌ڵ یه‌کدا ئاشتیان بکاته‌وه ‌ ، ئه‌و هه‌ڵبژاردنه‌ پارله‌مانیه‌یه‌ ، که‌ بڕیاره‌ له‌ مانگی حه‌وتی ئه‌مساڵدا به‌ڕێوه‌ بچێت ، چونکه‌ ئه‌مه‌ تاکه‌ ئه‌ڵته‌رناتیڤێکه‌ که‌ ببیته‌ ڕیپێیه‌ر و "گۆڕین" له‌ هه‌موو پۆسته‌ ئیداری و سیاسیه‌کان . هه‌روه‌ها هه‌ر ئه‌م هه‌ڵبژاردنه‌ جارێکی دیکه‌ متمانه‌ ده‌داته‌وه‌ خه‌ڵک ، که‌ مافی ئه‌وه‌یان هه‌یه‌ ، نوێنه‌ری خۆیان هه‌ڵبژێرن و موماره‌سه‌ی پرۆسه‌ی دیموکراسی بکه‌ن . هه‌ر ده‌سه‌ڵاتێک و هه‌ر حکومه‌تێکیش له‌ منداڵدانی جه‌ماوه‌ره‌وه‌ له‌ دایک بووبێت ،ئه‌وا هه‌ردووکیان ده‌بنه‌ ته‌واوکه‌ری یه‌کتری و هه‌میشه‌ ده‌ست به‌ باڵای یه‌کتره‌وه‌ ده‌گرن .
هه‌ر چه‌نده‌ پرۆسه‌ی دیموکراسی له‌ رۆژهه‌ڵاتی ناوه‌ڕاست به‌ گشتی و هه‌رێمی کوردستان به‌ تایبه‌تی ، تاراده‌یه‌ک کرچ و کاڵه‌ ، نه‌گه‌یشتووه‌ته‌ ئه‌و پنته‌ی که‌ ئازادییه‌کان به‌ ڕه‌هایی تێیدا هاتوچۆ بکه‌ن ، به‌ڵام له‌گه‌ڵ ئه‌مه‌شدا به‌ره‌و پێس چوون هه‌ر به‌رده‌وامه و‌ هیچ ئایدۆلۆژیایه‌کی سیاسی و کۆمه‌ڵایه‌تی و ئایینیش ناتوانێت ببێته له‌مپه‌ر له‌به‌رده‌میدا و ‌ ڕێگری ڕێگری لێبکات.
با بێینه‌ سه‌ر کرۆکی بابه‌ته‌که‌مان ، که‌ هه‌ڵوه‌سته‌ کردنه‌ له‌سه‌ر هه‌ردوو په‌یڤی "گۆڕان" و "گۆڕین" ، چونکه‌ له‌ ڕووی زمانه‌وانی سیاسیه‌وه‌ ، هه‌ڵگری دوو ناوه‌رۆکن ، که‌ دوو کرده‌ی جیایان لێده‌که‌وێته‌وه‌‌. سه‌ره‌تا گه‌ر پێناسه‌یه‌ک بۆ وشه‌ی "گۆڕان" بکه‌ین ده‌ڵیین : ئه‌و هێزه‌ داینامیکییه‌ یه‌ ، که‌ له‌ ده‌ره‌وه‌ی ویستی مرۆڤ گوزه‌ر ده‌کات ، واتا هێزێکی ئه‌کتیڤی ماددی نییه‌ ، له‌ پشت ئه‌م پرۆسه‌یه‌وه‌ ، تاوه‌کو به‌ ئاقارێکی پۆزه‌تیڤییانه‌ی دابه‌رێت ، یاخود له‌ پێناوی به‌رژه‌وه‌ندی گشتیدا کارای بکات . ده‌توانین ئه‌زموونی ئه‌م چه‌ند ساڵه‌ی هه‌رێمی کوردستان ناو بنێین "گۆڕان" ، چونکه‌ هێزی جه‌ماوه‌ر له‌ پشتییه‌وه‌ بوونی نه‌بووه‌ ، ئه‌م دیار نه‌بوونه و‌ هاوبه‌شی نه‌کردنه‌وی‌ جه‌ماوه‌ری‌ش فکره‌یه‌کی نوێ دێنێته‌ ئاراوه‌ ، که‌ تا ڕاده‌یه‌ک قه‌ناعه‌ت پێکه‌ره‌ بۆ ئه‌وه‌ی بڵێین له‌ ڕسته‌یه‌کی وه‌هادا "ده‌سه‌ڵات گۆڕاوه‌" په‌یامێکی دروست بگه‌‌یه‌نێت ، جا ئه‌م گۆڕانه‌ پۆزه‌تیڤ بێت یان نێگه‌تیڤ ، له‌ پێکهاته‌ی ئه‌م‌ ڕسته‌یه‌دا هیچ سه‌بژێکتێک یان هیچ که‌رسته‌یک ده‌رناکه‌وێت که‌ گۆڕان ئه‌نجام بدات ، به‌ڵکو ته‌نیا ئۆبژێکتێک هه‌یه که‌ ده‌سه‌ڵاته‌‌‌ ، ئه‌مه‌ش ڕاسته‌وخۆ وه‌ڵامه‌ بۆ ئه‌م په‌راوێز خستنه‌ی جه‌ماوه‌ره‌ له‌ لایه‌ن ده‌سه‌ڵاته‌وه‌ و ده‌لاله‌ته‌ له‌ فه‌رامۆش کردنیان له‌لایه‌ن سه‌رکردایه‌تی کورده‌وه‌، بۆیه‌ به‌ به‌کار هێنانی ئه‌م وشه‌یه‌ پاڵنه‌رێک( که‌ جه‌ماوه‌ره‌) ده‌خه‌یته‌ ئه‌ملاوه‌ ، که‌ خوڵقێنه‌ری ئه‌و جووڵه‌ هاڕمۆنیه‌یه‌ و بوونه‌یه‌تی پێویستیه‌کی هه‌میشه‌ییه‌ .
به‌ڵام کاتێک ده‌ڵێین "گۆڕین" ئه‌مه‌ له‌ ڕووی زمانه‌وانییه‌وه‌ ، هێزێکه‌ ، که‌ ئیراده‌ و ویستی له‌گه‌ڵدایه‌ و به‌ پێی پێویستی ده‌توانرێت ئاراسته‌ بکرێت و وه‌کو ئامرازێک بۆ خزمه‌ت کردنی کۆمه‌ڵگا له‌ گشت بواره‌ جیاجیاکاندا به‌کار بهێنرێت. خودی وشه‌ی "گۆڕین" دروستتره‌ بۆ ئه‌م لیسته‌ سیاسیه‌ی که‌ واقعی ئه‌مرۆی کوردستان به‌رهه‌می هێناوه‌ ، چونکه سه‌بژێکتێک له‌ پشتییه‌وه‌ هه‌یه‌ ، که‌ ‌ هێز و ئیراده‌یه‌کیان هه‌یه‌ ، ئه‌وانیش جه‌ماوه‌ر و چه‌ند که‌سایه‌تییه‌کی سیاسین ، که‌ مه‌به‌ستیانه‌ ئه‌م ڕه‌وت و دۆخه‌ی ئێستا بگۆرن به‌ شێوه‌یه‌ک که‌ بتوانێت وه‌ڵامی داخوازیه‌کانی هه‌ر تاکێکی ئه‌م هه‌رێمه‌ بداته‌وه‌. واتا له‌مه‌و دوا بکه‌ری گۆرین دێته‌ سه‌ر ته‌ختی پرۆسه‌ دیموکراسیه‌که‌ و خۆی نمایش ده‌کات ، و ئه‌و ئۆبژێکته‌ش که‌ پێویسته‌ کاری له‌سه‌ر بکرێت به‌ گشتی هه‌رێمی کوردستانه‌ و ده‌بێت له‌ ڕووی کارگێری و دارایی په‌یوه‌ندییه‌ ئقلیمییه‌کان ئاوڕێکی جدییانه‌ی لێبدرێته‌وه‌ ، بۆ ئه‌وه‌ی له‌م په‌تا سیاسیه‌ و کۆمه‌ڵاتییه‌ ده‌بچین که‌ ساڵانێکه‌ گردنی گرتووین .