كاتێ لەبرادەرێكم بیست گوایە كوڕ و باوكێك لەسەر كچێك دەبێتە شەڕیان، زۆرم لاسەیر بوو، بۆیە هەوڵمدا كە بەهەر شێوەیەك بێت، یەكێك لەوان بدوێنم. تا دەرئەنجام توانیم راستی ئەو رووداوە لەسەر زاری كوڕەكە ببیستم، بەڵام ئەو پێشوەختە داواكاری ئەوەبوو كە ناوەكەی بەشێوەی خوازراو بنوسم.
ئاكامی تەمەن 19 ساڵە، هاتە سەر گێڕانەوەی چیرۆكەكەی و وردە وردەش فرمێسك بەچاوەكانی دەهاتە خوارەوە، ئینجا گوتی "نیگا كچێكی باڵابەرزی چاوكاڵ بوو، رۆژێك بەڕێكەوت چاوم پێی كەوت و دڵم بۆی چوو، بەڵێنمدا كە بەهەر شێوەیەك بێت، بیكەم بەخۆشەویستی خۆم و ژیانی هاوسەری لەگەڵ پێكبهێنم، سەرەتاش توانیم بەهەر شێوەیەك بێت ژمارە تەلەفۆنەكەی پەیدابكەم. یەكەمجار كە تەلەفۆنم بۆی كرد، منداڵێك وەڵامی دامەوە، منیش پێمگوت نیگا لەكوێیە؟ بۆچی خۆی وەڵامی تەلەفۆنەكە ناداتەوە؟ گوتی خەریكی كاری ناو ماڵە، منیش تەلەفۆنەكەم داخست و ئەوكات وازم هێنا، بەڵام تەنها چەند كاتژمێرێك تێپەڕی نەكردبوو كە نوكەیەكم لەلایەن ئەو كچەوە بۆ هات، یەكسەر تەلەفۆنم بۆی كردەوە، ئەو گوتی فەرموو كاكە، تەلەفۆنت كردبوو، كارێكت هەبوو؟ هەرچەندە زۆر بەزەحمەت قسەم بۆ دەكرا، بەڵام بەهەر جۆرێك بێت وام تێگەیاند كە خۆشم دەوێت، بەڵام ئەو یەكسەر تەلەفۆنەكەی لەسەر داخستمەوە".
ئاكام، لەسەر قسەكانی بەردەوام دەبێت و دەڵێت "بۆ رۆژی دواتر نوكەیەكم بۆهات، سەیرم كرد هەمان ژمارەی ئەو كچەبوو، ئەوكات زۆر خۆشحاڵ بووم و تەلەفۆنم بۆی كردەوە، دوای چاك و چۆنی، دەستمان بەگفتوگۆ كرد، تا گەیشتە ئەو رادەیەی كە خۆی داوای كرد لەنزیكەوە بمبینێت، شوێنێكمان دەستنیشانكرد كە چاومان بەیەكتری بكەوێت، دوای ئەوە یەكترمان بینی و كاتێكی خۆشمان بەسەربرد. رۆژ لەدوای رۆژ خۆشەویستی نێوانمان بەهێزتر دەبوو، شەو و رۆژی واهەبوو بای دوو كارت تەلەفۆنم لەگەڵ دەكرد، جار بەجاریش لەبازاڕ چاومان بەیەكتری دەكەوت و دیاریمان پێشكەشی یەكتری دەكرد. ئەو خۆشەویستیەمان نزیكەی ساڵێك بەردەوام بوو. تارۆژێكیان داوامكرد كە داخوازی بكەم، بەڵام ئەو گوتی كەمێك سەبركە تا ئەمساڵیش خوێندنەكەم تەواو دەكەم، چونكە قوتابی قۆناغی ئامادەیی بوو، منیش گوتم زۆر ئاساییە با وابێت، بەڵام زۆرجار كە دەمویست تەلەفۆنی بۆ بكەم تەلەفۆنەكەی داخرابوو، ئەمە دەیخستمە دوودڵییەوە".
ئەو كوڕە لەكاتی گێڕانەوەی بەسەرهاتەكەی، لەناخی دڵەوە ئاخێكی هەڵكێشا و لەسەر قسەكانیدا بەردەوام بوو، گوتیشی "دوای تەواوبوونی وەرزی خوێندن، ویستم بەڵێنەكەم بەجێبهێنم و داخوازی بكەم، بۆیە وتم نیگا گیان، ئەوە ئەمساڵ خوێندنەكەت تەواوكرد، كاتی ئەوە هاتووە بێم بۆ خوازبێنیت، بەڵام هەستمكرد دوودڵییەك لەلای دروستببوو، وەك ئەوەی دڵی بەكەسێكی دیكە دابێت، چونكە ئەو دەیگوت تەمەنی هەردووكمان بچووكە، ئەگەر بۆ ساڵێكی دیكە بێت چۆنە؟ منیش گوتم مەحاڵە، دەبێت ئەمساڵ زەماوەندی بەیەكتر گەیشتن بكەین، دەرئەنجام ئەویش رازی بوو، گوتی دوای هەفتەیەكی دیكە وەرە خوازبێنیم، منیش زۆر شەرمم لەباوكم دەكرد، هەرچەندە باوكیشم زۆر بەتەمەن نەبوو، كەسێكی رێكوپێك بوو، شێوەی گەنجێكی بەتەمەنی دەدا، ناچاربووم لەرێگەی دایكمەوە بەباوكم بڵێم، كە ژنم بۆ بێنێ، ئەویش بانگی كردم، گوتی كوڕم تۆ هێشتا تەمەنت بچووكە و كاتی ژن هێنانت نەهاتووە، چونكە بەرپرسیارێتی ماڵ بەڕێوەبردن زۆر قورسە و ئەگەر بەقسەم دەكەیت ماوەیەكی دیكە چاوەڕوان بكەم؟ گوتم ئەوە مەحاڵە، كچێكم خۆشدەوێت دەبێ بۆمی داخوازی بكەن".
وەك ئاكام دەیگێڕێتەوە "دواجار باوكم رازی بوو، بەڵام بەو مەرجەی كە كچێكی باش بێت، منیش ناونیشانی كچەكەم پێی گوت، بەڵام باوكم وەك ئەوەی ئاوی ساردی پێدا بكەیت، وردە وردە رەنگ و روخساری تێكدەچوو. بۆ زیاتر ئاشنابوونی، باوكم گوتی دەكرێ بمبەیتە نزیك ماڵی كچەكە، منیش لەگەڵی چووم و كاتێ ماڵی كچەكەم نیشاندا، باوكم ئەوەندەی دیكە روخساری تێكچوو، خەریكبوو لەهۆش خۆی بچێت. یەكسەر گەڕاینەوە بۆ ماڵەوە و باوكم پێی گوتم ئەو كچە بەكەڵكی ئێمە نایەت و وازی لێبهێنە، هەر كچێكی دیكەی كە تۆ بتەوێت، بۆتی داخوازی دەكەم و زێڕ و خشڵی زۆری بۆ دەكەم. گوتیشی ئامادەم خانوویەكیشت بۆ بكڕم، چونكە باری داراییمان زۆر باش بوو، باوكم دەیتوانی ئەو خەرجیەم بۆ بكات، هەرچەندە سەرم سوڕما لەو قسەیەی باوكم كە ئامادەبوو هەموو شتێكم بۆ بكات لەپێنا و دەستبەردار بوونم لەنیگا، كەچی من هەموو خەون و خەیاڵێكم ئەو كچە بوو، منیش گوتم یان مردن یان دەبێت ئەو كچەم بۆ داخوازی بكەیت، تاوای لێهات شەڕ لەنێوانمان دروستبوو، باوكم زۆری لێدام و دەنگە دەنگ و هەڵلا دروستبوو، هەموو دراوسێكانمان خۆیانكرد بەماڵەكەمان و منیان لەبەردەستی ئەو باوكە بەئاگایە و منی بێ ئاگا دەرهێنا".
وەكو دواتر (ئاكام) گێڕایەوە "منیش ماڵەكەم جێهێشت و چووم بۆ ماڵی خاڵم، هەرچەند هەوڵیاندا نەگەڕامەوە ماڵەوە، باوكم رۆژێك پێیگوتم وەرە چەند قسەیەكی نهێنی هەیە پێت دەڵێم، ئەوكات ئەگەر رازی بوویت كچەكەت بۆ دەخوازم، چونكە باوكم ناچاربوو لەراستیەكان ئاگادارم بكاتەوە و هۆكاری داخوازنەكردنی ئەو كچەم پێبڵێت، باوكم ئەو نهێنییەی بۆ روونكردمەوە و پێی گوتم، كوڕی شیرینم ئەو كچەی تۆ باسی دەكەیت ماوەیەكی زۆرە پەیوەندی لەگەڵ مندا بەستووە، بێ ئەوەی بزانێت كە تۆ كوڕی منی، هەروەها منیش تا ئەو كاتەی پێت نەوتم من دڵم بەفڵان كچەوەیە، نەمزانی پەیوەندی خۆشەویستیت لەگەڵدا بەستووە، ئایا ئێستا چۆن دەكرێت كەسێكی دووڕوو كە هەردووكمانی فریوداوە، بۆ تۆی بخوازم، لەسەرەتاوە باوەڕم بەقسەكانی باوكم نەكرد، گوتم لەپێناو ئەوەی لەنیگا دوورم بخەیتەوە ئەو جۆرە قسانە دەكەیت، ئەمانە هیچی راست نین، بەڵام باوكم یەكڕاست مۆبایلەكەی لەگیرفان دەرهێناو دەنگی خەزنكراوی ئەوی لەلابوو، ئینجا بەبەرچاوی خۆم تەلەفۆنی بۆ كرد و قسەی لەگەڵدا كرد، وتیشی من خۆم ئەو سیمكارتەم پێیداوە، ئەوكات من كەمێك هۆشیار بوومەوە و زانیم كچێكی دووڕوو و بەدڕەوشتە".
ئاكام دەشڵێت "من لەناو خەم و خەفەت دابووم كەچی نیگا شەو تەلەفۆنی بۆ كردم، گوتی ئاكام بۆ نەهاتی بۆ داخوازیم، دیارە بێوەفا دەرچووی لەبڕیارەكەت و پەشیمان بویتەوە، منیش بەسەر خۆم نەهێناو گوتم چاوەڕوانبە داخوازیت دەكەم، رۆژی دواتر باوكم لەلای من تەلەفۆنی بۆ كرد و گوتی دەمەوێت بێیتە فلان شوێن، باوكم منی لەگەڵ خۆی برد و بەڕێ كەوتین، پێكەوە لەكچەكە نزیك بووینەوە و كاتێ ئەو دیمەنەی بەرچاو كەوت، رەنگی زەرد هەڵگەڕا، باوكم گوتی ئەو كوڕە دەناسیت؟ هیچی بۆ نەوترا، بۆیە باوكم زۆر قسەی پێگوت و منیش نەفرەتم لێی كرد و وتم ئەمە باوكمە كە دەمویست بینێرم بۆ خواز بێنیت".
لەوكاتەوە راستیەكانمان بۆ روون بۆوەو ئەو كچەش هەمیشە چاوشۆڕ و رووڕەشە، هەروەها كاتێ چاویشم بەباوكم دەكەوێت، هەست بەبرینداری دەكەم، چونكە ئەویش خیانەتی لەگەڵ خێزانەكەی كردووە، بەڵێنیشمداوە هەرگیز بیر لەخۆشەویستی كەسێكی دیكە نەكەمەوە

 

سةرجاوة:bakrajoo