زانا سویسرییه‌كان توانییان له‌ڕێگای لێكۆڵینه‌وه‌كانیانه‌وه بگه‌نه ڕاسته‌ ئه‌وه‌ی، بۆچی ‌هه‌ڵامه‌ت مرۆڤ دووچاری بێ هێزی ده‌كات.

ئه‌و چه‌كه‌ی سیسته‌می به‌رگری دژی هۆكاره‌كانی هه‌ڵامه‌ت به‌كاریده‌هێنێت، كاریگه‌ی نه‌گه‌تیڤی بۆ سه‌ر كاتژمێری ناوه‌كی مرۆڤ هه‌یه. ئاكامی ئه‌وه‌ش ده‌بێته هۆكاری كه‌مكردنه‌وه‌ی جوڵه‌ی مرۆڤ و هه‌روه‌ها له‌ش دووچاری سستی ده‌بێت، ئه‌مه‌ش هه‌روه‌ك لێكۆڵینه‌وه‌كانی سه‌ر مشكی ناو تاقیگه نیشانیدا.

توێژه‌رانی ئه‌م لێکۆڵینه‌وه‌یه هۆكاری ئه‌وانه‌ش بۆ پڕۆتینی ناسراو به "TNF-alpha" ده‌گه‌ڕێنه‌وه: ئه‌و پڕۆتینه‌ش له‌لایه‌ن سیسته‌می به‌رگرییه‌وه دروست ده‌كرێت، تا له‌شی مرۆڤ له‌هۆكاره‌كانی نه‌خۆشی بپارێزێت.

ماوه‌یه‌كی زۆر زاناكان گومانیان له پڕۆتینی ناوبراو هه‌یه. بۆ نموونه ئه‌وانه‌ی دووچاری نه‌خۆشی ڕۆماتیزمه ده‌بنه‌وه، له‌ناو خوێنه‌كانیان بڕێكی یه‌كجار زۆر له پڕۆتینی "TNF-alpha" به‌دی ده‌كرێت.

هه‌ر له‌میانه‌ی ئه‌م لێكۆڵینه‌وه‌یه‌شدا توێژه‌ران هه‌ڵسان به‌به‌رزكردنه‌وه‌ی ئاستی پڕۆتینی "TNF-alpha"، له‌ئاكامدا بۆ توێژه‌ران ده‌ركه‌وت، كه مشكه‌كان دووچاری بێ هێز و لاوازی هاتوون، ئه‌وه‌ش به‌به‌‌راوردكردن له‌گه‌ڵ ئه‌وه مشكه‌كانه‌ی ئاستی پڕۆتینی ناوبراویان تێدا به‌رز نه‌كراوه‌ته‌وه.

تیمی لێكۆڵینه‌وه‌ی سویسری‌ به‌سه‌روه‌ری "Gionata Cavadini" توانی نیشانی بدات، چۆن پڕۆتینی TNF-alpha" ده‌بێته هۆكاری بێ هێزی مرۆڤی نه‌خۆش: پڕۆتینی ناوبراو هه‌ڵده‌ستێت به‌سستكردنی چالاكی هه‌ندێك له‌ ‌جینه‌كانی مێشك، ئه‌وانه‌ی به‌رامبه‌ر خه‌وتن و به‌ئاگابوون لێپرسراون. هه‌رچه‌نده چالاكی جینه‌كان سست ده‌كرێن، به‌ڵام ناوبه‌ناو له‌نیوه‌ی كار ده‌خرێن.

ئاكامی ئه‌و سستكردنی چالاكییه‌ش توێژه‌ران توانییان به‌شێوه‌یه‌كی ڕاسته‌وخۆ له‌مشكه به‌شداربووه‌كانی ئه‌م لێكۆڵینه‌وه‌یه‌دا به‌دیبكه‌ن.

هه‌رچه‌نده تاكو ئێستا هیچ ئه‌نجامێكی هاوشێوه له‌سه‌ر مرۆڤ تێبینینه‌كراوه، به‌ڵام توێژه‌ران پێیانوایه، كه هه‌مان ئه‌نجام ده‌كرێت له‌سه‌ر مرۆڤ ده‌ربكه‌وێت.

بێجگه‌ له‌وانه‌ش، ئه‌وانه‌ی دووچاری شێرپه‌نجه‌ هاتوون و به "TNF-alpha" چاره‌سه‌ر ده‌كرێن، زیاتر به‌ده‌ست لاواز و بێ هێزییه‌وه ده‌ناڵێنن.


خۆزگە//