دوای دۆڕاندنی داعش ولەدەستدانی هەموو ئەو ناوچانەی لەژێر دەسەڵاتیاندا بوو و کوشتنی زۆربەی سەرکردەکانی وخۆشاردنەوەی سەرکردەکەیان البەغدادی هیچ شتێکیان بەدەستەوە نەماوە تەنها کاوولکردنی ماڵی هەژارو بێدەسەڵات نەبێ! بۆ ئەوەی دەریبخەن کە هێشتا ماوون و خراپەیان پێ ئەکرێت. زۆر ئاشکرایە تێکدانی باری ئابوری سەر لە حکومەت تێك ئەدات وسەرنجیان ڕائەکێشێت بۆ لایەکی تر لەجیاتی ئەوەی بەدوای ئەوانەدا بگەڕێن کە ماونەتەوە لە داعش و وەك مشك خۆیان حەشارداوە لە لوتکەی شاخەکان ولەژێر زەویدا لەناوچە نزمەکان. ئەمەش بێگومانە کە ئەوان پێی هەڵساون وبەهیچ هۆیەکی سروشتیەوە نەبوە چونکە لە گۆڤارەکەی خۆیاندا دانیان پیاناوەو شانازی پێوە ئەکەن.
ئەم هەڵسوکەوتە ناشێواوە ولەمانگی ڕەمەزاندا کە شەیتان دەستبەست ئەکرێت روونی ئەکاتەوە کە لە شەیتان خراپترن وخراپەی زیاتر ئەکەن، هەروەها ڕوونیشی ئەکاتەوە کە هیچ پەیوەندیەکیان نیە بەئاینی ئیسلامەوە چونکە ئیسلام بەهیچ جۆرێك ڕیگا بە سوتاندنی نیعمەتی خوای مەزن نادات وئەوانیش خۆراکی موسڵمانی بێتاوان ئەسوتێنن. ئەبێ هەموو ڕوو بکەینە یەزدان وهاواربکەین کە ئەو پیاوخراپانە لە ووڵات ومنداڵمان بە دووربن.