جاران ئه‌مان ووت له‌ جیاتی هه‌ڵه‌بجه‌یه‌ک
هانێ ئه‌وه‌ سروده‌ ته‌ڕه‌که‌ی ئه‌یڕه‌قیب و
ئه‌وه‌ش مشتێک له‌و خاکی وه‌ته‌نه‌ی
کچه‌کانی به‌ قه‌یره‌ی هێشتینه‌وه‌ و
پڕی کردین له‌ بێده‌نگی
جاران ئه‌مان ووت شیفای غه‌ریبی
... شکاندنی سه‌رخه‌وێکه‌ له‌باوه‌شی هه‌ڵه‌بجه‌دا
ڕشتنی چاوه‌کانی قه‌سیده‌یه‌ به‌ کلی هه‌ڵه‌بجه
ته‌ڕ کردنی خونچه‌کانی قسه‌کردنه‌ به‌ ئاوی چاوی هه‌ڵه‌بجه‌
جاران وامان ده‌وت و
که‌سیش کراسی تووڕه‌ی نه‌ده‌کرده‌ به‌ری خۆی و
که‌سیش له‌به‌ر بێوه‌فای ده‌رگا
به‌ربارانی په‌نجه‌ره‌کانی نیشتیمانی نه‌ده‌کرد
جاران ئیمه‌ مشتێک باران بووین
له‌مه‌رکانه‌ی ماڵه‌ جافیکی شیرینی هه‌ڵه‌بجه‌دا
هه‌ر ئێمه‌ بووین به‌ عیشقه‌وه‌
له‌ جامخانه‌یه‌کی پیرۆزی گوندی هاوار
ڕوو له‌ پردێوه‌ره‌وه‌ ده‌وه‌ستاین و نزامان ده‌کرد نزای حه‌ق
به‌به‌رگی شه‌هاده‌تیشه‌وه‌ مۆمه‌ ڕه‌نگاوره‌نگه‌کانی یارسانی پاکمان پیده‌کرد
ئه‌وه‌ ئێمه‌ بوین ،
ئه‌وه‌ ئیمه‌ بوین منداڵانی موعتاد به‌ خۆشه‌ویستی کۆتر
به‌ ڕه‌سمکردنی که‌ناریه‌کان له‌ ده‌می گۆرانی ووتندا
ئه‌وه‌ ئێمه‌ بووین . ئێمه‌

جه‌مال غه‌مبار